Saisonbericht Seniorinnen 2016-2017

Saisonbericht Seniorinnen Saison 16/17

Ungloublech das Gfüeu vo Erfoug u Sieg. Stouz simer gxi u höch hei mer üsi Chöpf treit. Wüchentlech hei mir uf Tabäue gluegt u üs ab üsem 1. Platz gfröit. Fasch die ganzi Vorrundi si mir a erschter Steu gstange.

Ir Gruppe vom Verband si 5 Seniorinne Mannschafte gmäudet, dass si die usrangierte Volleyfroue über 32i.

Usrangschiert heisst nid öppe schlächt oder schwach. Meischtens hei die e Rischthöchi vo eim Meter 75cm.

Mi chönnt ou fasch säge das sige die Ross wo chli ruhiger wei ga….oder wie seit me de aute Ross?——Märe nöime.

Mit üs spiut no Wisle a u b, Toffe u Brügg i dere Gruppe.
I gägesitigiem Iiverständnis hei mir de e drüfachrundi chönne spile. U wies der Zuefau wott het Brügg die erschte drei Mätsche gäge üs gspiut. Mir hei die erschte drei au grad gwunne. U när isches no grad mitemene Sieg gäge Wisle A witergange u so hei mir der Podeschtplatz lang chönne sichere.

Abgschlosse hei mir die Saison ufem 4. Platz vor Brügg…natürlech…..

Näbem Spiufäud heis mir gäng grossartig. Bim chätsche vo tröchnete Mangos u Schoggieier luege mir zunenang u probiere a de Meischterschaftsmatche aues z gä. Sogar we düre Tag d Sunne dermasse bländet dass d Passeuse geng muess luege, dass si wortwörtlech im Schatte vom Block steit.
Mit der nöie Spielerin Irene hei mir itz ou ufem 1.75m Niveau e Chance. Jungi Fülli tüe üsere Frouschaft guet…..

Der Usfau vor These isch ungünschtig u sicher e Töifpunkt ir Saison. Immerhin het si ds Chnöi nid bim volleyle verheit.

Was üs bsungers Fröit, isch dass itz ou mir chöi z Hochzyt ga, d Kathrin wotts i Ehestand mit em Hanspeter wage. Ob är d Hose anne het wüsse mer no nid so genau.

D Kathrin wott uf ändi Saison mit Volleyle ufhöre. Für die nächschti volleyfreii Zyt wünsche mir dir aues Guete…..

Geng wie geng si mir glücklech, dass mir mitenang chöi Zyt verbringe u mit Volley e Liideschaft chöi teile. Uf die nächschti Saison wärde mir wieder e Mannschaft mäude.